اعرف من اين اتلقى الصدمات .. فقد اختلطت الحسابات ))
تايه دليلي الحزن ... والدمعه عنواني
راح وتركني الفرح
ولوحدي خلاني
واحبابي كلهم صفو
خنجر غدر بالروح
محد وكف من طحت .. وكفولي عدواني
المن تون يا كلب
غدار حته الطيف .. ما اجاك راد الوسه
بس رادك تعاني
غربل همومك بعد ... متفيدك الحسرات
وامشينه لا يا كلب
امشينه شمتاني
(بعد مال )
البخت شيعدله يا كلبي بعد مال
ولا كسراتي يجبرهن بعد مــال
ملهم باكو ايامك بـــــــعد مــل
واذكر لو تحن ذيج الاذيه
***
ظامي وسكوك الالم .. وتجعرت مايه
والغايه
كسرك عجل مو وصلو الغايه
يوسف انه بمحنتي
بس ما غدرني اخوان
روحي التحبهم صفو بس اعكس الايه
هد حيلي حيل الجرح
ما ضلي ذاك الحيل
طاير رماني الحزن ... طحت انه فختايه
دنياي علنت حرب .. صلفه وجديح سيوف
وشلون افوت بحرب
ومنكس الرايه
(ولو مات )
جرح الروح متفيده ولومات
ويدك بيه عتب كلبي ولومات
العزيز شما يذل يبقه ولو مات
عزيز وروحه تبقاله ابيه
****
يا كلبي مالك تون ... صدكني مو ناسك
ذوله المحو فرحتك
والخنكو انفاسك
بطل بعد لا ترف .. ما بيه جدم يلوج
خذ عبرتك واعتبر
من جرحو احساسك
محتاج صولة غضب .. تنفظ غبار الضيم
مو غبرتك يا كلب .. وصلت لحد راسك
عصفور عشك حزن
حاير تروح لوين
ما اجاك يوم الفرح .. لو بالجذب باسك
( وشراي )
انه المحتار دلوني وش الراي
وانه البايع فرح كلبي وشراي
حزن .. ما ينفع بخيري وشري
بس حركه ومرار يذب عليه
***
متعافي يا هلكلب .. وشلون متعافي ؟؟
مو هذه لسه الغدر
طعناته بجتافي
دنيايه وبلا بخت .. مالت بعد ميفيد
اترك هواهم بعد ياكلبي مو كافي ..؟
ادري انه صبرك جذع .. ما تحني ضهره الريح
وادري انه سهرك جفن
ما يوم ابد غافي
لكن يكلبي شتظن .. هلدنيه تنصف يوم
واليغدرك يا كلب
يرجعلك يوافي